Струга, 2 ноември 2025 (МИА) - Кандидатот за градоначалник на Општина Струга Арсим Далипи од Националната алијанса за интеграција предводена од ДУИ денеска гласаше во избирачкото место 1899 во селото Ливада.

За него ова е многу значаен ден за Струга, кога граѓаните преку нивниот глас одлучуваат за иднината на општината во наредните четири години.

- Ја користам приликата да се обратам на сите граѓани, без разлика Албанци, Македонци, Турци, Роми, Власи, Египќани, да гласаат мирно, одговорно, достоинствено и пред се со почитување еден спрема друг, бидејќи Струга секогаш била и ќе биде местото на соживотот и комбинација на многу култури и етникуми и како таква треба да биде и натаму пример, изјави Далипи. 

Тој посочи дека во текот на камањата одел од врата на врата, разговарал со луѓето и ја нудел неговата визија.

- Моето отворено срце и искреност за една подобра Струга, за една заедничка и подеднаква Струга. Околу мене се собрани млади, кои го сакаат нашиот град од душа и имаат визија за една Струга со подобра иднина. И јас сум убеден и верувам дека денес Стружани ќе одлучуваат токму за таа нова генерација, нова енергија и пред се довербата за чесно работење, додаде Далипи. сс/вј/

Фото: МИА